Über eus

Euse Verein isch im Joor 2008 binre gmüetligä Rundi im Bärchis Bistro in Gälterchinde gründet worde. Zu dä Gründigsmitglieder hei dr Simon Trummer, Thorsten Rucktäschel, Fabienne Mangold, Patrick Wyss und dr Ivan Graf ghört. Ihri Idee isch gsi, mit guetä Kollegä zäme ä neuä Verein z’gründe, wo d’Pfläg und Förderig vo dr Fasnacht im Oberbaselbiet bezwäckt. Zämehalt und Läbensfreud an dr Fasnacht mitenand uszläbe isch sehr wichtig für eusi Gruppe und schweisst eus au usserhalb vo dr Fasnacht zäme.

Mir ghöre zu dr GEFA, das heisst mir si ä Verein us Gälterchinde wo aktiv an dä beidä Umzüg in Gälti mitmacht und au süscht mithilft d’Fasnacht im Dorf mitzpräge und mitzgstalte.

Zur Zit si mir mitem Fahrer zäme 8 Aktivmitglieder und chönne mit Freud uf ca. 100 Passivmitglieder zellä, wo eusä Verein teils au tatchräftig unterstützä (Kostüm näie, Wage spraye, Material und Maschinä zur Verfüegig stellä usw.) und mit ihrne freiwilligä Biträg euses nid grad billigä Hobby am läbe halte.

Euses Vereinslogo isch vom Künstler Thorsten Rucktäschel und sim Brüeder vo Hand entworfe und uf äs Holzschild gmolt wordä. Das Schild, also das Logo symbolisiert die erst Larve wo mir an der Fasnacht 2009 präsentiert hei und isch euses offiziellä Vereinslogo. Jedes Joor wirds mit Stolz ganz vorne am Traktor montiert, dass vo witem erkennbar isch wär mir si.

An dr erstä Fasnacht im Joor 2009 isch euses Sujet ä Clown gsi, dr sogenannt “Chaoteclown“. Will mir alli ä chli “chaotisch“ si, durets amä chli lang bis mir ans Wageboue und and Fasnachtsvorbereitig gönd, abr am Schluss entstoht immer ä tolle Wage, wo alli ihre ganz persönliche Isatz derzue gleistet hei. Euses Sujet bestimmä mir all Joor ufs neue mit dr Mehrheit vo dä Stimme. Nid all Joor isch es ä aktuells Thema us Sport, Politik odr Wirtschaft, sondern cha au ä ganz speziells Sujets si wo eus spontan ifallt…, es chunnt halt immer ufe Ideerichtum vo eusne Mitglieder a 😉

An dr Fasnacht 2010 hei mir s’Sujet “Musketiere“ gha und s’Joor druf si mir “Häxe“ gsi. Im 2012 ischs “Jubiläum vom Feldschlössli“ usgspielt wordä und im 2013 hei mir euses 5 jährige Bestoh jubilarisch in Gold gfiiret. Euse Wage isch dazumol ä Zitraffer gsi mit Filmrolle uf dä Sitewänd, wo die vorgängige 4 Joor Fasnacht ufzeigt, oder nomol in Erinnerig gruefä hei. Letscht Joor isch denn äs recht aktuells und politischs Thema usgspielt worde, nämlich “Fusion vo dä beidä Basel“. Bi traumhaftem Wetter hei mir das Sujet dä zahlrichä Zueschauer dörfä vorführä. Au in Zuekunft werdä eusi Sujets zwüsche aktuellä und fantasievolle Themä variierä.

Am Samstig vorem grosse Umzug in Sissach, findet immer ä grosse Wage-Iweihigsapéro statt. An de lade mir eusi Passivmitglieder i und präsentiere ihne euses aktuelle Sujet. Bi spiis und trank wird denn bis in die früe Morgestunde ine gfiiret, was sich bim eint oder andere denn am Umzug no bitz dur d Augering bemerkbar macht.